ಕನಸುಗಳು ಕೊಲೆಯಾಗಿವೆ!!

ಮೈಯೆಲ್ಲಾ ರಕ್ತಮಯ
ಕನಸುಗಳ ಕೊಲೆಯಾಗಿದೆ!!
ಕೊಲೆ ಮಾಡಿದವ ನೀನೆ,ಅದೇ ನನಗೀಗ
ತೊಂದರೆ,ಸಾಕ್ಷಿ ನಿನ್ನ ವಿರುದ್ಧ ಹೇಳಲಾರೆ!!
ನೀ ತೊಟ್ಟಿದ್ದ ತಿಳೀ ಗುಲಾಬಿ
ಬಣ್ಣದ ಮೇಲಿದೆ ನೋಡು ರಕ್ತದ
ಕಲೆ, ಏನು ಹಾಕಿದರೂ
ಹೋಗದು ಈ ಕಲೆ

ನಿನ್ನ ಗಾಡಿಯ ಹಿಂದೆ ನನ್ನ
ಹೆಸರಿದೆಯಲ್ಲಾ ಅದೇ
ಆ ಗಾಲಿಗಳ ಅಡಿಯಲ್ಲಲ್ಲವೇ,ನನ್ನ
ಕನಸುಗಳು ಹ್ಯಾಂಡ್ ಬ್ಯಾಗಿನಿಂದ
ಜಾರಿ ಬಿದ್ದದ್ದು, ಗಾಲಿಗಳ
ಸ್ವಚ್ಚ ಮಾಡಿಸು,ತುಕ್ಕು ಹಿಡಿಯಬಹುದು
ಹಾಗೇ ಹೋಗದು
ಈ
ರಕ್ತದ ಕಲೆ.

ನನಗೀಗೀಗ ಹುಚ್ಚು ಅಂದೆಯಲ್ಲಾ
ಹೌದು,ನಿನ್ನ ಪ್ರತೀ ವಸ್ತುವಿನಲ್ಲು
ನನಗೆ
ನನ್ನ ಕೊಲೆಯಾದ ಕನಸುಗಳು
ಕಾಡಲಾರಂಭಿಸಿದೆ
ಭೂತದಂತೆ
ನೀನು,ನಿನ್ನ ಅಂಗಿ
ಬೈಕು,ಈ ಕೀ ಚೈನ್
ಮೊಬೈಲ್
ಎಲ್ಲಾ ರಕ್ತಮಯ

ಕೆಂಪು,ಕೆಂಪು ತೊಳೆದರೂ
ಹೋಗದ ರಕ್ತದ ಕಲೆ
ತೊಳೆದೂ,ತೊಳೆದೂ
ಹಿಡಿಯುತ್ತಿದೆ ಹುಚ್ಚು
ಆದರೂ ಹಾಗೇ ಹೋಗದು ಇದು
ಕನಸಿನ ರಕ್ತದ ಕಲೆ!!

ಮಧು-ಮತ್ತ ಗಳಿಗೆ

ಮಧುವೇ! ನೀ ನನ್ನ ತಾಯಿ,ನಿನ್ನ
ಮುದ್ದಿನ ಪರಿಗೆ ಬದುಕಿದೆ,ನಾ ಬಡಪಾಯಿ!
ನೀನೆ ಆಹಾರ,ನೀನೆ ನೀರು
ರಾತ್ರಿ ಚುಕ್ಕಿಯಲ್ಲಿ ನೀನೆ ನನ್ನ ಚಾರಪಾಯಿ!!

ನೋಡು ಅವಳಿಟ್ಟ ಹೆಜ್ಜೆಗಳು ಮನದ ತುಂಬಾ
ನಿನ್ನಲ್ಲೂ ಕಾಣುವುದು ಅವಳ ಮೋಸದ ಬಿಂಬ!
ಖಬರಿಲ್ಲದೆ ಹೋಯಿತೆ ಎನಗೆಅವಳ ಹೆಜ್ಜೆಯ ಪರಿಯು
ನಾನಿಲ್ಲಿ ಒಂಟಿಹಕ್ಕಿ ಹಾರಲಾರೆ,ಕಿತ್ತಳಲ್ಲ ಕನಸಿನ ರೆಕ್ಕೆಯ!!

ಆದರೂ ನಾ ನಿನ್ನ ನಂಬಿರುವೆ"ಸಾಲಿ"! ನೀಗುವೆಯ ದುಮ್ಮಾನ
ನೀನವಳಿಗಿಂತ "ಧೋಕಾ"!ಬಟ್ಟಲಲ್ಲಿದ್ದರೂ ಅದೆಷ್ಟು ನಿನ್ನ ಸುಮ್ಮಾನ!
ಸಾಗುತಿದೆ ಕಾಲುಗಳು ಬಾನಿನ ಕಡೆಗೆ,ಎದೆಯೊಳಗೆ ತುಂಬಿತು ನಿನ್ನ ಕಡಲು
ಹಾಸಿಹಳು ಸೆರಗು ಗೆಳತಿ ಇನ್ನಾರಿಗೋ ನೀನಾದರೂ ಕೇಳು ಎನ್ನ ಅಳಲು!!

ಮುಳುಗುತಿದೆ ಏಳುತಿದೆ ಚಂದ್ರನ ಬಿಂಬ,ಎದೆಯಲ್ಲಿ ಹಾಲಾಹಲದ ಹಾಲು
ಈ ರಾತ್ರಿ ಆಗಸದಲ್ಲಿ ಸೂರ್ಯನ ಮರಣದ ಕಾರಾವಾನ್, ಖಾಲಿ ಖಾಲಿ ಭೂಮಿಯ ಒಡಲು

ಹೂವು ಸುಡುವ ಪರಿಯ ನಾ ತಡಕೊಂಡಿರುವೆ,ಮತ್ತೆ
ನೀನೂ ನನ್ನ ಸುಡುವೆಯಾ?
ಸುಟ್ಟರೂ ಸರಿಯೆ, ನಿನ್ನ ಝಲಕ್ಕಿಗೆ ಮರುಳು!
ನಾ ನಿನ್ನ ಪರವಾನಾ ತಿಳಿದೆಯಾ!!

ನಿನ್ನ ಸೌಂದರ್ಯದ ಮುಂದೆ,ಗೆಳತಿಯೇನು?
ಈ ಜೀವನವನ್ನೇ ನಿನಗೆ ಒತ್ತೆ ಇಡಬಲ್ಲೆ ನಾನು!!
ನಾನು ನೀನು ಕೂಡಿ ಕಳೆದ ಎಲ್ಲಾ ಮತ್ತ-ಗಳಿಗೆ
ಅದರೂ ಉಳಿವ ಶೇಷ ಮೊತ್ತ ಅವಳೇ ಕೊನೆಗೆ!!